There has been an underlying theme to this cultural cite which has been concerned with nationalism and patriotism as reflected in Urdu literature. An Opera written by noted Urdu poet Rahi Masoom Raza,and produced by Muzaffar Ali was staged in the ballet format at the Dilkusha Palace Lucknow, yesterday evening. We bring the text for those not based in Lucknow, and others.
parda uThta hai
eik luta huva baazaar hai. kahin kahin ab bhi dhuvaan uth raha hai . Saamaan bikhra para hai. Chand laashen bhi pari hui hain. Logon ke chiikhne ki aawaaz aati hai. BuuRha maghmuum (grieved) hai. But ki tarah khara, lute hue baazaar ko dekh raha hai.
chorus
lucknow, lucknow, lucknow, lucknow
apne hi khuun mein Duub kar surkh ru
hai Khizaan mein bhi gul posh tera chaman
tera maathe pe raqsaan hai ab bhi kiran
ab bhi zinda hai ye markaz-e-rang-o-bu
lucknow, lucknow, lucknow, lucknow
teri kalaiyaan hain goya sanaanon ke phal
teri har mahjabiin eik hazrat mahal
zakhmon ki is qaba se baRhi aabruu
lucknow, lucknow, lucknow, lucknow
Chorus gaata hua chala jaata hai
Buurha
Khaamoshi eiRiyaan ragaRti hai
jhurriyon ki tahen bigaRti hain
suuliyon par hai jahd-e-aazaadi
ban mein hai ab dilon ki shahzaadi
sa-birahna jawaaniyaan nikli
pa-birahna kahaaniyaan nikli
loriyaan shor ke havaale hain
Khwaab ke paon mein bhi chhaale hain
kaun ab chhere taar-e-daaman ko
raakhiyaan Dhuundti hain bairan ko
Thumriyon ke labon pe khushki hai
daadre ka kaleja chhalni hai
ghungruu larzaan hain, tabla sahma hai
kone kutre mein chhipke baithe hain
har makaa.n lukhnow ka be dar hai
ab na hazrat mahal na lashkar hai
kaan nuchte hain baaliyon ke liye
haath kaTte hain chuuRiyon ke liye
koi to zahmaton ko shumaar kare
lucknow mar raha hai pyaar kare
Shair ka daakhla – woh bohat thaka hua hai baazaar ko dekh ke hairaan ho jaata hai
raahi ab thak ke chuur hai baba
lucknow, ab kitni duur hai baaba
lucknow kaisa lucknow shair
kis ki hai tum ko justuju shair
lucknow naar bhi hai, nuur bhi hai
lucknow paas bhi hai duur bhi hai
lucknow gul bhi, daaman-e-nam bhi
lucknow zaKhm bhi hai marham bhi
lucknow dard-e-hijr-e-jalwa bhi
lucknow soz bhi hai naghma bhi
tum shair ho itna batlao
ho jo mumkin to itna samjhao
yun to sab kuchh jahan mein hota hai
koi naghma fana bhi hota hai
raahi ab thak ke chuur hai baba
lucknow, ab kitni duur hai baaba
Burha –
lucknow kaisa lucknow shair
tumko hai kis ki justuju shair
dil ka baazar luT gaya shair
lucknow ab kahan raha shair
mera dil ro raha hai mat bolo
lucknow so raha hai mat bolo
tum bhi baazaar ka samaa dekho
shaam hai kis qadr jawaan dekho
dekh lo kis maze se leTe hain
laash mat jaaniyo ye baanke hain
jang toKhatm ho gai shair
tum ne aane mein der ki shair
ab jo oRhe hai maut ki chaadar
laRte laRte gira hai ye thak kar
apne se duur ho chuka tha ye
zakhmon se chuur ho chuka tha ye
laR raha tha magar ye jaan- ba- kaf
tha na machhi bhavan na shaah najaf
raat aur din ke is bayaabaan mein
gomti rah gai hai maidaan mein
ruuh tak ab aliil hai shair
ye kahaani taviil hai shair
jo ho kahna tumhen kaho shair
ye raha lucknow, milo shair
banduukon ki aawaazen qariib aa jaati hain.
shair –
baba tum aao mere saath chalo
mere haathon mein deke haath chalo
gore aate hain kya laro ge tum ?
is jagah ruk ke kya karo ge tu ?
raaste chhoR do, haTo baba
lucknow chhoR kar chalo baba
buurha –
baba ab thak ke chuur hai shair
lucknow duur duur hai shair !
kis taraf hai ummiid ka saahil ?
lucknow chhorne se kya haasil ?
mujhko ek baat khaaye jaati hai
zinda.h rahne se sharm aati hai
logon ke chiiKhne aur karaahne ki aawaaz aur qariib aa jaati hai
jaan ab apni yun bachaen ham
aao laashon mein leT jaayen ham
buurha shair ko ghasiit kar laashon mein leT jaata hai. Bhaagte hue logon ka eik giroh jisme auraten aur bachche bhi hain zakhmon se chuur daakhil hota hai, aur chiiKhta hua duusri taraf nikal jaata hai. In ke jaane ke baad hi goliyaa.n chalaate angrez sipaahi daakhil hote hain. Aur inhin ke piichhe dauRte hue duusri taraf nikal jaate hain. Eik angrez afsar ke saath eik sipaahi ruk jaata hai.
shair –
ye huQuumat ka intezaam nahin
barbariyat hai, inteqaam nahin
buurha –
laash ban kar paRe raho shair
chup raho shor mat karo shair
afsar –
pahle to ye mazaa bhi deta hai
qatl karna thakaa bhi deta hai
sipaahi –
phir bhi murde mein jaan hai major
is khanDhar mein bhi shaan hai major
dono chale jaate hain. Buurha Shair ko le kar khaRa ho jaata hai.
buurha —
zindagi ka nishaan hai shair
lucknow sakht jaan hai shair
ab batao tumhaare saath chalun
ya main farda ka intezaar karun
shair –
har taraf raat hai andhera hai
kya pata kis taraf savera hai
bastiyon ki kami nahin lekin
koi basti mili nahin lekin
laRai abhi tamaam nahin
har taraf tiirgi aur ban hai
bas qalam ka chiraaGh raushan hai
phir bhi ye do-pehar hai shaam nahin
ek nahin, do nahin, hazaar nahin
ye molvi ka koi shumaar nahin
kya safar mein ye subh-o-shaam nahin
is ghulaami ko bhi dawaam nahin
Buurha –
laal hai khuun se zamii.n shair
jiine ka hausla nahin shair
zehr-e-ghum koi kyun piye shair
koi kiske liye jiye shair
zakhmon se chuur Gomti ka daakhla. libaas taar taar hai. Chalte mein qadam laRkhaRa rahe hain
Gomti –
aaye mera payaam le koi
dauR kar mujko thaam le koi
shair –
jang to Khatm ho gayi shair
tum ko kuchh der ho gayi shair
woh girne lagti hai.shair lapak ke use sambhaalta hai. BuuRha diwaanawaar laashon ko jhinjhoRta hai’
Buurha
maut ka uTh ke raasta roko
Gomti so na jaaye,jaag paRo
jaago shaam-e-awadh ke parwaano
jaago ay Gomti ke diiwaano
Gomti
dekh lo main nidhaal hun shair
ab to main ek sawaal hun shair
jiine mein koi dilkashi hi nahin
Buurha
Gomti ! tu nahin, to main bhi nahin
meri aankhon ki raushni ! mat ja
Gomti ! meri zindagi ! mat ja
shair
baba tum is qadar na ghabrao
Buurha –
Gomti ji rahi hai batlao
zakhmon se chuur ho chuki haiye
shair –
jaan mat do ke ji rahi hai ye
Gomti –
woh meri justuju mein marte hain
gore mujh ko talaash karte hain
shair –
gore bhatkenge gard-e- mahmil mein
aarzuu ban ke chhip raho dil mein
Gomti –
jaan aa kar labon pe aTki hai
waqt kam daastaan lambi hai
baba, tum ye batao kaisi hai
meri hazrat mahal to achhi hai !
hai kahan, wo wafa ka koh-e-giraa.n
mera diwaana molvi hai kahan
waqfa
koi talwaar si chubhota hai
mere zakhmon mein dard hota hai
ye batao, kahan savera hai
duur tak kya yahi andhera hai
kya hai aalam idhar udhar shair
tum sunao koi khabar shair
shair –
gore saari faza mein phaile hain
lafz ghar se nikalte uRte hain
dilli bebas si aaj bebas hai ?
chaandni chowk mein amaavas hai !
shaah-raahon pe suuliyon ke siva
na hai raahi,na koi raahnuma
kahin pardah nahin hai aaR nahin
kisi ghar mein koi kiwaaR nahin !
ye hai dilli ka muKhtasar qissa
raaj hai kampani bahaadur ka !¡
baKht khan ka kahin mila na nishaa.n
TaaTiya bhi na jaane gum hai kahan
aur jhaansi pe ye bala aayi
mar gai laR ke laxmi bai
har taraf maut hai tabaahi hai
sirf Ghaddaaron ki ban aayi hai
laashe dekhe hain main ne shaaKhon par
bachche dekhe hain main ne naizon par
har taraf raat hai andhera hai
sirf tera chiraaGh jalta hai
har taraf raat hai andhera hai ,
sirf mera chiraaGh jalta hai
bandookon ki aawaazen qariib aa jaati hain –
chaap sunte ho in darindon ki ,
main bhi mehmaa.n hun chand lamhon ki
Buurha – bebasi ke josh se
is diye ko bachaa sako to bachao
uTho diiwaar daamanon ki uThao
gomti aakhri rivaayat hai
chorus gaana gaate hue daakhil hota hai
sar pe hai aaj tuufaan chala jayega
ye andhera bhi hai mehmaan chala jayega
duur manzil hai magar aisi bhi koi duur nahin
chorus
aao mujhpar koi qasam khao
aao hazrat mahal idhar aao
pardah
hon sada sakht, ye haalaat ka dastuur nahin
aaj pairon mein hai zanjiir giraa.nbaar to kya
laakh majbuur ho, par aadmi majbuur nahin
sarpe hai aaj jo tuufaan chala jayega
ye andhera bhi hai mehmaan chala jayega
shart itni hai ke raahi rahen sargarm safar
shajr-e-shab mein bhi aate hain sitaaron ke samar
ham ne dekha hai ke har raat ki hoti hai saher
ham ne dekha hai sada zulm ka jhukte hue sar
sarpe hai aaj jo tuufaan chala jaye ga
ye andhera bhi hai mehmaan chala jaye ga
tashnagi ! barh ke koi ju-e ru paida kare !
tu jahaan se nahin, tu apna jaha.n paida kare
raah min tere andhera hai to parwaah nahin
kabhi ek chaand, kabhi kahkashaa.n paida kare
sar pe hai aaj jo tuufaan chala jayega
ye andhera abhi hai mehmaa.n chala jayega
chorus gaana gaata hua chala jaata hai
Buurha –
aashiyaa.n ab kahan banaen ham
Gomti ko kahan chhippaen ham
raaste band hain, uTho shair
munh se tum bhi to kuchh kaho shair
shair –
baba is mein koi guzand nahin
aarzuon ki raah chaon hai
aarzu ki manzil mein
Gomti chhip rahe mere dil mein
baba sun lo, ye maslehat bhi hai
ganga shiv ki jata mein baithi hai
– gomti ki aankhen band hone lagti hain
baba – honthon par ungli rakh kar
apne mein kho gaiyi hai mat bolo,
Gomti so gayi hai mat bolo
kisko niind aayi kaun sota hai
– gomti aankhen khol deti hai
baba ! zakhmon mein dard hota hai
bhaagte hue qadmon aur goliyon aur chiikhne chilaane ki aawaazein bohat qariib se aane lagti hain. Buurha Gomti aur Shair ko le kar laashon mein leT jaata hai. Bhaagte hue zakhmi logon ka giroh girta paRta daakhil hota hai, aur chiikhta hua duusri taraf chala jaata hai. Phir kuchh angrez sipaahi aate hain. Kuchh chale jaate hain. Kuchh ruk jaate hain.
lucknow ka har eik ghar dekha
Gomti ka magar pata na chala
ham ne maidaan to ye maara hai
Gomti hi ka eik Khatra hai
gomti ko kahan se ham laaen
kis taraf DhuunDe kis taraf jaaen
chorus daakhil hota hai
is ka milna muhaal hai paagal
Gomti ek khayaal hai paagal
ye na samjho ye kaam aasaa.n hai
Gomti nikhat-e-pareshaa.n hai
goron ko gomti nahin milti
raat ko raushni nahin milti
chorus chala jaata hai
afsar –
raat kaafi hai raushni ke liye
daar qaayam ho Gomti ke liye
chand sipaahi jaate hain. aur chand hi lamhon mein eik saliib la kar khaRi kar dete hain. Is biich mein afsar apni talwaar se laashon ko konchta rehta hai.
chorus gaata hua daakhil hota hai
chorus –
ye gore bhi, logon suno lo , bas nikle diwaane
is duniya ko yaad rahenge zulm ke ye afsaane
eik sahma hua Buurha daakhil hota hai
zulm ki dhuup mein duur duur tak bas phaansi ki taain
andhon ne apne zulm ka gaagar, khud chhalkaaya
in ke munh par thuuk rahe hain, kya apne begaane
is duniya ko yaad rahenge zulm ke ye afsaane
dehaaton ne goli payi, aur shehron nen phaansI
itna zulm kiya goron nen duniya hai ruuhaa.n si
duniya se insaaf ke taalib hain ab ye viiraane
isduniya ko yaad rahenge zulmke ye afsaane
eik ghabrai hui aurat ka daakhla
afsar –
ham ko batla ke gomti hai kahan
kyun hai chup khol apni kaali zubaa.n
– aurat dileri se use ghuurti hai aur chup rahti hai
aurat –
aankhon mein aankhen daal ke
Gomti ka pata bataun main ?
aisi laanat ka bojh uThaun main ?
mukhbari to mera shaar nahin
itna bhi zindagi se pyaar nahin
afsar –
Gomti ka pata bata aurat
aurat –
muKhbari karne waale par laanat
Gomti maamta ka nuur bhi hai
Gomti mang ka sinduur bhi hai
hanste hanste main jaan de dun gi
lekin apni zubaa.n na kholungi
maa hun, mamta ka nuur kaise dun
hun suhaagin sinduur kaise dun
afsar barh kar aurat ko thaRar maar deta hai
Gomti –
baba ab ye saha nahin jaata
mujh se ab chup raha nahin jaata
afsar – aurat se
kyun bulaati hai apni tu shaamat
Gomti ka pata bata aurat ;
woh use phir thapaR maarta hai. Shair se bardaasht nahin hota. woh khaRa ho jaata hai.
is bichaari pe ab na haath uTha
main bataata hun Gomti ka pata
shair aur mukhbari ki laanat ? dekh
ay wafa ; aa ke apni zillat dekh
gir gaya shair apne rutbe se
koi ab kis par eitmaad kare
phir bhi main dil bura nahin karti
main kisi se gila nahin karti
waise to baat ye baiid na thi
mujh ko shair se ye ummiid na thi ;
officer- shair se
tu batae ga gomti ka pata
ham baRhaenge martaba tera
faiz ahmed faiz ke sher mein thoRi si tabdiili kar di gayi hai
aurat – shair se
tere gharwaale munh chhipaenge
un pe log ungliyaan uthaenge
afsar – shair se
is ki baaton pe tum na kaan dharo
jis se rutba baRhe wo kaam karo
aurat – afsar se – shair ki taraf ara kar ke
iski baaton pe tum na kaan dharo
Gomti main hun mujhko phaansi do
shair – aurat ki taraf ishaara kar ke
sote bchchon ki siskiyon mein hai
Gomti zakhmi loriiyon mein hai
Gomti in luTi dukaanon mein
Gomti chiikhte makaanon mein
Gomti main bhi hun, ye aurat bhi
Gomti meri iski nafrat bhi
sun liya tumne Gomti ka pata
ab baRhao na martaba mera !
afsar –
khair ham justuju mein the shair
tum bhi mauqe se mil gaye shair
ham tumhaara lahu bhi chaaTenge
hum tumhaari zubaan bhi kaaTenge
shair –
koi suraj se us ki hiddat ko
zindagi se namu ki aadat ko
ishq se is ke miithe sapnon ko
aur shair se uske naghmon ko
chhiin paaya, na chhiin sakta hai
afsar – shair se –
ab ye batlao, kya iraada.h hai
bhaagna hai to bhaag kar dekho
bad-zubaa.n ki zubaa.n kaaT to lo
sipaahi se –shair- hiqaarat se
apne qisse tumhen sunaata kyun
bhaagna hota to main aata kyun
do sipaahi usse pakaR lete hain. Tiisra uski zubaan kaatna chahta hai. Gomti beqaraar ho jaati hai. Buurha use rokna chahta hai.
gomti – buurhe se
baba ab ye saha nahin jaata
mujh se ab chup raha nahin jaata
Sipaahi shair ki zubaan kaat lete hain. Gomti khaRi ho jaati hai
Gomti
gomti main hun
aurat – baat kaat kar
gomti main hun
Gomti –
gomti main hun
gomti main hun
Sipaahi aurat ki taraf mutawajje nahin hote. Gomti ko pakar lete hain. Aurat Gomti ko chhuRaane ke liye diWaanawaar sipaahiyon parTuuT paRti hai. Eik nepaali sipaahi use qaruli maar deta hai. woh gir jaati hai.
Gomti –
gomti main hun mujh ko de lo saza
be-gunaahon ko maarne se kya
Shair –
nahin- woh raushni nahin hai ye
officer, gomti nahin hai ye
ye to paagal hai,kar na lena yaqii.n
Gomti ko ye jaanti bhi nahin
aurat shair ke munh par thuuk deti hai. sipaahi use ghasiit kar eik taraf phenk dete hain.shair aastiin se munh ponchhta hai.
gomti ko ye jaanti bhi nahin
puuchho is shahr ke makaanon se
gomti bah rahi hai aankhon se
ban ke khushbu chhipi hai phuulon mein
daagh ban kar chhipi hai siinon mein
aurat – kohniyon ke bal uThne ki koshish karti hai aur phir gir jaati hai
raushni main hun – raushni main hun
Gomti main hun – Gomti main hun
mar jaati hai
sipaahi Gomti ko masluub kar dete hain
afsar haath jhaar kar –
chalo ye kaambhi tamaam hua
Ab se hindustaan ghulaam hua
Angrez sipaahi kahkahe lagaate hain. Phir chale jaate hain. In ke jaate hi Buurha dauR kar Gomti ke paas aata Hai. Shair diwaanawaar Gomti ke pairon se lipaT jaata hai, aur uske haathon aur pairon se bahne waala khuun chehre par malne lagta hai. Gomti aankhen khol deti hai.
ye na socho ke ab main qissa hun
mere shair abhi main zinda hun
chorus ka daakhla- chorus
khuun hai khuun ki rawaani hai
ye kahaani bhi kya kahaani hai
hazrat mahal ka daakhla- haath mein nangi talwaar hai jis se khuun tapak raha hai.
hazrat mahal daur kar gomti se lipaT jaati hai
hazrat mahal
kaise bahta hua ye khuu.n rokuu.n
main kin aankhon se ye samaa dekhuu.n
aaftaab . apni raushni le ja
raat waalon ko raushni se kya
duur tak sirf ret phaili hai
zindagi jazb hoti jaati hai
Gomti se
zakhmon mein dard ho raha hai ? kaho
gomti bolo, mujhse baat karo
Gomti
mujhko chhoro,meri na fikr karo
jao, goron se lar sako to laro
Buurha
Daalo teori pe bal, jihaad karo
jao hazrat mahal, jihaad karo
hazrat mahal
achha qismat ko aazmaati hun
lucknow chhor ke main jaati hun
lucknow ka to ab wo haal nahin
ab yahan jang ka sawaal nahin
jang ka to bigRr chuka naqsha
har gali kuucha hai firangi ka
morcha ab yahan nahin banta
koi surat nahin rahi baba
kya bataun ye raat hai kaisi
laashon mein raah tak nahin milti
ye sadma uTha rahi hun main
ye qasam kha ke ja rahi hun main
qaid- khaane mein mar nahin sakti
sulah goron se kar nahin sakti
hazrat mahal chali jaati hai – chorus gaata hai
bolo hazrat mahal ja rahi ho kidhar
hain kaRe kos aur sakht hai safar
manzilein bhi nayi hain nai raahguzar
jao lekin ye sun lo, jhukaana na sar
bolo hazrat mahal ja rahi ho kidhar
bolo hazrat mahal ja rahi ho kidhar
zakhmon se chur molvi ka daakhla. wo Gomti ke saamne talwaar ke sahaare khaRa ho jaata hai.
ye na samjho chala gaya hun main
jaan dene ko aa gaya hun main
haan laRai abhi tamaam na ho
pa birahna awadh ki shaam na ho
baba
ran se jis dam sawaari aayegi
Gomti aarti utaare gi
ab bhi aabaad hai gali dil ki
Gomti sar jhuka nahin sakti
molvi
kya maza rah gaya hai jiine mein
ek jwaala mukhi hai siine mein
aur ab aayegi qayaamat kya
eik insaan ki haqiiqat kya
na ummiidi zirah pehnaati hai
maut aa aa ke dil baRhaati hai
baba
tum kisi ko pukaarte bhi nahin
nahin jiite , to haarte bhi nahin
zakhm khaoge, muskurao ge
tum abhi duur duur jaoge
molvi
zakhmon se laRkhRa raha hun main
phir bhi laRne ko ja raha hun main
Gomti se
Gomti, tujh ko main bachaun ga
tujh ko in zakhmon mein chhipaun ga
Gomti aankhen khol deti hai
hai jo marna to chain hi se maruun
molvi aa main tujh ko piya karuun
Molvi Gomti ke qadmon par haath rakh deta hai
zindagi ka fareb khaana mat
sar kata dena, sar jhukaana mat
Molvi chala jaata hai . Buurha Gomti ke paas sar jhuka kar baith jaata hai. Shair diwaanawaar stage par ghuumne lagta hai. Goliyon ki aawaaz yak bohat tez ho jaati hai. Phir sannaata ho jaata hai. Sannaata hote hi Shair eik dam se ruk jaata hai. woh yak bohat thak jaata hai.laRkharaata hai. saliib ka sahaara leta hai. aur tik jaata hai.
chorus gaana gaata hai.
suno bhaiyon, suno bhaiyon, katha suno saawan ki
kaan khol kar suno, katha hai krant ke pahle saawan ki
jaan bech kar laRe firangi se dharti ke laal
zakhmon ke baazaar khul gaye, bika sarvan ka maal
diwaane har raah se guzre, gali gali hai laal
dil ki nagri luuT maar ke bhi gore kangaal
har har raahguzar par laashen, aas hai kiske darshan ki
suno bhaiyon, suno bhaiyon, katha suno saawan ki